Save Burma

ပြည်သူတွေဆီမှာ လွတ်လပ်မှုနဲ့ တန်းတူညီမျှမှု အရင်ဆုံး ရှိနေမှ ဒီမိုကရေစီ စံနှုန်းရှိတာ ဖြစ်ပါတယ်။

Archive for August 2011

ဒီမိုကရေစီတွင် အရပ်သားအစိုးရက စစ်တပ်ကို အပြည့်အဝ ထိန်းချုပ်နိုင်ရန် လိုအပ်ခြင်း

leave a comment »

Written by Lwin Aung Soe

August 30, 2011 at 8:38 pm

အသွင်ကူးပြောင်းရေးကာလသို့ ဦးတည်ပြီ

leave a comment »

အသွင်ကူးပြောင်းရေးကာလသို့ ဦးတည်ပြီ

ပြိုင်ပွဲဟူသည် အနိုင်ရရှိရေးအတွက် တဘက်နှင့်တဘက် ယှဉ်ပြိုင်ရခြင်း ဖြစ်သည်။ အင်အားသာသည့်ဘက်မှ အနိုင်ရပြီး အင်အားနည်းသည့်ဘက်က အရှုံးထွက်ရစမြဲ ဖြစ်သည်။ အားကစားဖြစ်စေ၊ နိုင်ငံရေးဖြစ်စေ၊ လက်နက်ကိုင် တိုက်ခိုက်မှုဖြစ်စေ၊ စီးပွားရေးဖြစ်စေ၊ တရားရေးဖြစ်စေ အပြိုင်အဆိုင် ဖြစ်လာသော နှစ်ဘက်မှ အနိုင်ရအောင်  ကြိုးပမ်းကြသည်။ ယုတ်စွအဆုံး မိသားစုတခုအတွင်းမှ သာမန် အငြင်းပွားမှုတခုတွင်ပင်လျှင် အနိုင်ရရှိရေးအတွက် အသဲအသန် ငြင်းခုန် ရန်ဖြစ်တတ်ကြသည်။

မည်သည့်ကဏ္ဍဖြစ်စေ အနိုင်ရရှိရေးအတွက် ပြိုင်ဆိုင်မှုမှန်သမျှ နှစ်ဦးနှစ်ဘက် (သို့) အများက သဘောတူညီမှု ရှိသော မျှတသည့် စည်းမျဉ်းဥပဒေဘောင်အတွင်းမှသာ ယှဉ်ပြိုင်ရသည်။ မိသားစုဖြစ်လျှင် ထိုမိသားစု၏ စည်းကမ်းနှင့် စရိုက်ပေါ်တွင် မူတည်ပါလိမ့်မည်။ သို့သော် ဤဆောင်းပါးကိုရေးသားရသည့် ရည်ရွယ်ရင်းမှာ ပြိုင်ပွဲ မဟုတ်ပါ။ အခြေခံစည်းမျဉ်းဥပဒေများတွင် တရားမျှတမှု မရှိပါက အဓိပ္ပာယ်ကင်းမဲ့သော ပြိုင်ဆိုင်မှုကိုသာ ဖြစ်စေ သောကြောင့် ပိုမို၍ အဓိပ္ပာယ်ရှိရှိ အကျိုးဖြစ်ထွန်းနိုင်စေမည့် နိုင်ငံရေး အကျိုးအမြတ်တခုခုသာ ရည်ရွယ်ပါသည်။

ယခုနောက်ဆုံး မြန်မာ့နိုင်ငံရေး အခင်းအကျင်းသည် ပြိုင်ပွဲတရပ် မဟုတ်တော့ပါ။ အသွင်ပြောင်းကာလသို့ အပြု သဘောဖြင့် ချဉ်းနင်းဝင်ရောက်လာနေသည်။ သူ့ဘက်ကိုယ့်ဘက် ပူးပေါင်းလျက်၊ အပြန်အလှန်ကူညီလျက် တလှေထဲစီးတခရီးထဲသွားကြသည့် ခရီးသည်များ ဖြစ်လာကြပါတော့မည်။ နှစ်ပေါင်း ငါးဆယ်ကျော် ခြောက်ဆယ် အတွင်း ပြည်သူများ ပထမဦးဆုံးကြုံတွေ့ရတော့မည့် မင်္ဂလာရှိသော နိုင်ငံရေးအခင်းအကျင်းဟုပင် ဆိုချင်ပါသည်။

မည်သည့် ဒီမိုကရေစီနိုင်ငံမဆို အသွင်ကူးပြောင်းရေးကာလတွင် လွတ်လပ်မှုနှင့် တန်းတူညီမှု ရှိရေးကို ရှိရှိသမျှ အင်အားစုအားလုံးတို့က ညီညာဖျဖျ ပူးပေါင်းဆောင်ရွက်ခြင်းသည် အရင်ဦးဆုံးအလုပ် ဖြစ်သည်။ ထိုသို့ မလုပ် နိုင်လျှင် အသွင်ကူးပြောင်းရေးကာလက မအောင်မြင်နိုင်ဘဲ ရှိနေတတ်သည် (သို့) အချိန်ကြန့်ကြာနေတတ်သည်။ တဘက်နှင့်တဘက်ပြိုင်ဆိုင်မှု ဆိုသည်မှာ တရားမျှတမှုကို အခြေခံကျကျ တည်ဆောက်ပြီးချိန်တွင်သာရှိရသည်။ ပြိုင်ဆိုင်မှုသည် တိုးတက်မှုကို ဖြစ်စေသောကြောင့် လက်သင့်ခံနိုင်သော နည်းလမ်းတခုဟု မည်သို့ပင်ဆိုစေကာမူ တရားမျှတမှုကို အရင်ဦးစွာ တည်ဆောက်ယူရသည်။ ဒီမိုကရေစီတွင် လွတ်လပ်မှုနှင့်  သဟဇာတဖြစ်စေမှုတို့ကို ထိန်းပေးထားသည့် တန်းတူညီမျှမှုက အလွန်အရေးကြီးသောစံနှုန်းတခု ဖြစ်သည်။ ဒီမိုကရေစီနိုင်ငံဟု ပြတ်ပြတ် သားသား ကြေညာရဲလျှင် ဤစံနှုန်းက အပြည့်အဝရှိနေသောကြောင့်သာ ဖြစ်ရပေလိမ့်မည်။

အသွင်ကူးပြောင်းရေးကာလ တလှေထဲစီးတခရီးထဲသွားနေသူတို့အချင်းချင်း အသာစီးရလိုသူများအတွက် နေရာ ရှိမည် မဟုတ်ပါ။ သို့သော် ဤခရီးကို အမှန်တကယ် သွားလိုသူဖြစ်လျှင် အများနည်းတူ တန်းတူညီမျှစွာ နေထိုင် ကျင့်ကြံဖို့တော့ လိုပါမည်။ တန်းတူညီမျှနိုင်အောင်လည်း ကျန်ခရီးသည်တို့က ဖေးမထိန်းကျောင်းရပါလိမ့်မည်။

မြန်မာနိုင်ငံ၏ အတိတ်ကာလတွင် တရားမျှတမှုကို အခြေမခံသော နိုင်ငံရေးအခြေအနေများ၌ တဘက်နှင့် တဘက် ပြိုင်ဆိုင်မှုများ ရှိနေခဲ့သည်။ နိုင်ငံသားအချင်းချင်း အနိုင်ကျင့် နှိပ်စက်သတ်ဖြတ်ကြသောကြောင့် သွေးထွက်သံယိုဖြစ်သူဖြစ်၊ ဘဝပျက်သူပျက်၊ သေသူသေခဲ့ကြရသည်။ နိုင်ငံသားအချင်းချင်း မခံမရပ်နိုင်သော နာကျည်းမှုများ ရှိလာခဲ့သည်။ ရန်ငြိုးနှင့် အာဃာတသည် နိုင်ငံရေး စစ်မြေပြင်၏ ထာဝရ ရှင်သန်နေသော မြက်ရိုင်းပင်များပမာ ဖြစ်နေခဲ့သည်။ တမြေတည်းနေ တရေတည်းသောက်လျက်ကပင် တဦးနှင့်တဦး ရွံရှာ မုန်းတီးနေခဲ့ကြသည်။ သံသယစိတ်များ မဖျောက်နိုင်ဘဲ ရှိနေခဲ့ကြသည်။ အကြောက်တရားပိုကာ ကြောက်ကန် ကန်နေခဲ့ကြသည်။ ဂရုဏာ၊ မုဒိတာ၊ ဥပက္ခာ ဆိုသည်မှာ ဝေလာဝေး၊ မေတ္တာထားနိုင်ဖို့ကိုပင် မလွယ်ကူသည့် ကြမ်းတမ်းခက်ထန်လိုသောစိတ်များ ဝင်နေခဲ့ကြသည်။ တဘက်ကို ဖိနှိပ်ချိုးနှိမ်ထားမှ မိမိအနေသာမည့်၊ ကောင်းစားမည့် တကိုယ်ကောင်း စိတ်ဓါတ်မျိုးကို တမင်တကာ မွေးမြူ ကျင့်သုံးသူတို့လည်း ရှိနေခဲ့ကြသည်။

ဤသို့သော နိုင်ငံရေးကြောင့် ဖြစ်ရသည့် ဆိုးကျိုးတရားများသည် လူတဦးချင်းအတွက်ဖြစ်စေ၊ အဖွဲ့အစည်းတခု အတွက် ဖြစ်စေ၊ ကုန်ကုန်ပြောရလျှင် နိုင်ငံအတွက်ပင်ဖြစ်စေ မလိုအားအပ်မှန်း၊ မကောင်းမှန်း၊ လက်မခံထိုက်မှန်း သိကြမည်သာ ဖြစ်သည်။ သို့သော် ပြန်ပြင်ယူနိုင်စွမ်း မရှိခဲ့ကြပါ။ ဤဆိုးကျိုးတရားများက တဦးချင်း တဖွဲ့ချင်း မှသည် တနိုင်ငံလုံးထိ ပြန့်နှံ့သွားသောအခါ နိုင်ငံရေးစရိုက်ဆိုးတခု ဖြစ်လာတော့သည်။ မည်သည့် နိုင်ငံရေး စရိုက်မဆို တိုင်းပြည်၏ ကံကြမ္မာ အဆိုးအကောင်းကို ဖန်တီးမြဲဖြစ်သည်။ စရိုက်ကောင်းသူသည် ကြီးပွားတိုးတက် သကဲ့သို့ စရိုက်မကောင်းသူက တက်အုပ်ချုပ်သောအခါ တိုင်းပြည်ပျက်တော့သည်။

ကျနော်တို့သည် အမိမြန်မာနိုင်ငံကြီးကို ငြိမ်းချမ်းသာယာ ဝပြောစေချင်ပါကြသည်။ အနည်းဆုံး ပတ်ဝန်းကျင် နိုင်ငံများထက် မသာလွန်သည့်တိုင်အောင် အမီလိုက်ကာ ခေတ်ပေါ်ပစ္စည်းများကြားတွင် စိတ်ချမ်းသာ ကိုယ်ချမ်းသာ နေထိုင်လိုကြသည်။ မျှတမှန်ကန်သော တရားဥပဒေ၏ အကာအကွယ်အောက်တွင် သမ္မာအာဇီဝ အလုပ်ဖြင့် သန့်ရှင်းစင်ကြယ်သောဘဝကို ပူပင်ကြောင့်ကျ ကင်းစွာ တည်ဆောက်လိုကြသည်။ အချိန်အားရလျှင် ပရဟိတအလုပ်ကို ဝင်လုပ်လိုက်ဖို့ ဆန္ဒရှိကြသည်။ သို့တည်းမဟုတ် တရားဘာဝနာ ပွားများကာ ကောင်းမှု ကုသိုလ်ပြုလျက် နေချင်ကြသည်။

ကျနော်တို့၏ ဆန္ဒများ ပြည့်ဝလာနိုင်ပါမည်လား။ တနေ့နေ့တွင် ပြည့်ဝလာနိုင်ရမည်ဟု ယုံကြည်နေမိပါသည်။ ထိုနေ့ကား မဝေးတော့ဟု ထင်သည်။ ယခုအချိန်သည်ကား နိုင်ငံရေးစရိုက်ဆိုးများကို ဖယ်ရှားစပြုလာသည့် အသွင်ကူးပြောင်းရေးကာလ ဖြစ်သည်။ စရိုက်ဆိုးများကို ကောင်းအောင် ပြန်ပြင်ယူကြသည့် အချိန်ဖြစ်သည်။ အပြုသဘောဖြင့် မြင်တတ်လာချိန်လည်းဖြစ်သည်။ ဤသို့သော မရှိစဖူး ထူးထူးကဲကဲ မင်္ဂလာအချိန်ကောင်းတွင် တိုင်းပြည်၏ ရင်းမြစ်စွမ်းအားအသီးသီးကို ပိုင်ဆိုင်ထားကြသည့် ဒေါ်အောင်ဆန်းစုကြည်နှင့် ဦးသိန်းစိန်အစိုးရ တို့၏ ဦးဆောင်သူ နှစ်ဘက်စလုံးက အပြန်အလှန် ယိုင်းပင်းကူညီကာ ဖေးမလက်တွဲခေါ်ခြင်း၊ ပူးပေါင်းကာ အခြေခံတရပ်တည်ဆောက်ခြင်းဖြင့် အများပြည်သူ မျှော်မှန်းတောင့်တနေသော ဒီမိုကရေစီပန်းတိုင်သို့ ရောက်ရှိ သည့်နေ့မှစ၍ မြန်မာပြည်သူ လူထုတရပ်လုံး၏ ပကတိလိုအပ်ချက် ဆန္ဒများ ပြည့်ဝလာပါတော့မည်။

လွင်အောင်စိုး

၂၇-၈-၂ဝ၁၁

Download pdf – Toward a transitional period

Download Word – Toward a transitional period

Written by Lwin Aung Soe

August 27, 2011 at 12:07 pm

တိုင်းပြည်တည်ငြိမ်အေးချမ်းရေးအတွက် မျှော်လင့်စရာ ပထမခြေလှမ်း

leave a comment »

ပြည်သူလူထုတရပ်လုံး၏ ပကတိလိုအပ်ချက်ဆန္ဒများကို ဖြည့်ဆည်းပေးသည့်အနေဖြင့် တိုင်းပြည်တည်ငြိမ် အေးချမ်းရေးနှင့် ဖွံ့ဖြိုးတိုးတက်ရေးအတွက် နိုင်ငံတော်အစိုးရနှင့် နှစ်ဘက် လက်တွဲဆောင်ရွက်သွားမည်။

(ဒေါ်အောင်ဆန်းစုကြည်နှင့် ဦးအောင်ကြည် ဒုတိယအကြိမ် တွေ့ဆုံဆွေးနွေးပွဲ ၁၂-၈-၂ဝ၁၁ မှ)

တိုင်းပြည် တည်ငြိမ်အေးချမ်းရေးအတွက် လက်နက်ကိုင် တားဆီးရုံ၊ ဥပဒေ ပြဌာန်းရုံ၊ တရားစီရင်ကာ အပြစ်ပေးရုံဖြင့် မည်သို့မျှ မလုံလောက်ပါ။ စစ်တပ်အင်အား နည်းခြင်းများခြင်းသည် ပြည်ပကျူးကျော်မှုနှင့်သာ အဓိကသက်ဆိုင်သည်။ ရဲနှင့် ထောက်လှမ်းရေးတို့အတွက်ကား ဥပဒေနှင့်လမ်းညွှန်ချက်တို့ကို မည်မျှထိ တိကျစွာ လိုက်နာ ထိန်းသိမ်းပေးနိုင်သည့် အချက်ပေါ်တွင်သာ မူတည်သည်။ တရားမျှတသော ဥပဒေနှင့် တိကျ မှန်ကန်သော တရားရေးစနစ်တို့ ရှိနေသည့်တိုင်အောင် ကိုယ်ကျင့်တရားများ ဖောက်ပြန်နေသရွေ့ တိုင်းပြည်တည်ငြိမ်အေးချမ်းမည် မဟုတ်ပါ။ တဖန် ကိုယ်ကျင့်တရားများ ကောင်းမွန်နေပါသော်လည်း မျှတမှုများ ရှိမနေပြန်လျှင်လည်း တိုင်းပြည် တည်ငြိမ်အေးချမ်းမည် မဟုတ်ပါ။

နိုင်ငံတွင်းမှာသာမက နိုင်ငံပြင်ပနှင့် ပတ်သက်၍လည်း တိုင်းပြည်တည်ငြိမ်အေးချမ်းရေးကို ထိခိုက်လာနိုင် သည်များ ရှိနေတတ်သည်။ မိမိနိုင်ငံ၏ နိုင်ငံခြားရေးမူဝါဒ၊ စီးပွားရေးမူဝါဒတို့အပေါ် မူတည်သကဲ့သို့ နိုင်ငံတကာ သဘောတူညီချက်များကို မည်မျှထိ လိုက်နာကျင့်သုံးနိုင်သနည်း၊ မိမိနိုင်ငံမှ ခေါင်းဆောင်နှင့်နိုင်ငံရေးစနစ်အပေါ် အခြားနိုင်ငံများနှင့် အဖွဲ့အစည်းများမှ မည်မျှအထိ လက်ခံနိုင်သနည်း၊ မျိုးချစ်စိတ်အပြင် လူမျိုးရေးနှင့် ဘာသာရေး ပြင်းထန်မှုက မည်မျှထိ ဆိုးကျိုးသက်ရောက်သွားစေနိုင်သနည်း စသည်တို့အပေါ်တွင်လည်း မူတည်တတ်သည်။

ဘက်နှစ်ဘက်က တိုင်းပြည် တည်ငြိမ်အေးချမ်းရေးကို အမှန်တကယ် ဆောင်ရွက်နိုင်ရန်မှာ နှစ်ဘက်စလုံးကပင် အာမခံနိုင်ရပါမည်။ ကိုယ်စီပိုင်ဆိုင်ထားကြသော ရင်းမြစ်စွမ်းပကားများဖြင့် အပြန်အလှန်ကူညီ ပူးပေါင်းကာ တိုင်းပြည် တည်ငြိမ်အေးချမ်းရေးကို ထူထောင်ရပါမည်။ ဆိုလိုရင်းမှာ မိမိဘက်တွင်ရှိနေသော ရင်းမြစ် စွမ်းပကားတမျိုးမျိုးကို အခြားတဘက်က မပိုင်ဆိုင်ဘဲ ရှိနေပြီး အခြားတဘက်၏ ရင်းမြစ် စွမ်းပကားတမျိုးမျိုးကို မိမိဘက်က မပိုင်ဆိုင်သော အခြေအနေတွင် အပြန်အလှန် အပေးအယူလုပ်၍ တခုတည်းဖြစ်အောင် ပေါင်းစပ်ခြင်း ဖြစ်သည်။ သမိုင်းတွင်မည့်လုပ်ရပ်ဟု ဆိုချင်ပါသည်။

လတ်တလော အခြေအနေအရဆိုရလျှင် ပြည်သူလူထုတရပ်လုံး၏ လုံခြုံရေးသည် အဓိကအကျဆုံး ဖြစ်သည်။  မတရားဖိနှိပ်ချုပ်ချယ်မှု အကြောက်တရားနှင့် စစ်ဘေးဒဏ်များမှ ပူပင်ကြောင့်ကျ ကင်းရှင်းစွာ နေထိုင်သွားလာနိုင် ရေး အတွက် နှစ်ဘက်စလုံးက မိမိတို့ တတ်နိုင်သည့်အနေအထားမှ အကောင်းဆုံးလုပ်ဆောင်ပေးရပါလိမ့်မည်။ လုံခြုံမှု မရှိလျှင် စားဝတ်နေရေးကို ရပ်တည်ကြိုးပမ်းမှုကို မည်သူမျှ မလုပ်နိုင်ပါ။ လုံခြုံရေးသည် ပြည်သူလူထု၏ ပကတိလိုအပ်ချက်ဖြစ်သော ဆန္ဒတခုဖြစ်ပြီး အရေးကြီးတကာ့ အရေးကြီးဆုံးတခုဟု ထင်ပါသည်။ လူထုဆန္ဒကို လေးစားခြင်းနှင့် အကောင်အထည်ဖော်ပေးခြင်းသည် နိုင်ငံ့ခေါင်းဆောင်တို့၏ ဂုဏ်သိက္ခာရှိသော တာဝန်ဝတ္တရား ဖြစ်ပြီး လက်ဆင့်ကမ်း အမွေအနှစ်ကောင်းလည်းဖြစ်ရာ လူထုလုံခြုံရေးသည် အဦးဆုံး ထွက်ပေါ်လာမည့် ရလဒ်ကောင်းဟု မျှော်လင့်မိသည်။

ပြည်သူလူထု လုံခြုံရေးအတွက် မလုပ်မဖြစ်သောကိစ္စများတွင်

  1. မျှတမှန်ကန်သော တရားဥပဒေ စိုးမိုးမှု၊
  2. လူ့အခွင့်အရေးများကို လေးစားကာကွယ်ပေးနိုင်ခြင်း၊
  3. တမျိုးသားလုံး ရင်ကြားစေ့ကာ ပြန်လည်သင့်မြတ်ရေး၊
  4. ပြည်တွင်းငြိမ်းချမ်းရေး၊
  5. နိုင်ငံရေး လွတ်လပ်ခွင့် တို့ပါဝင်ပါသည်။

တရားဥပဒေစိုးမိုးမှုနှင့် လူ့အခွင့်အရေးများကို လေးစားကာကွယ်ပေးနိုင်မှုတို့အတွက် မရှိမဖြစ် အလိုအပ်ဆုံးမှာ ဒီမိုကရေစီကို အခြေပြုထားသော နိုင်ငံရေးစနစ် ဖြစ်သည်။ ဤသို့သော နိုင်ငံရေးစနစ်မျိုးဖြင့်ပင် တမျိုးသားလုံး ရင်ကြားစေ့ ပြန်လည်သင့်မြတ်ရေးနှင့် ပြည်တွင်းငြိမ်းချမ်းရေးကို အောင်မြင်အောင် လုပ်ဆောင်နိုင်သကဲ့သို့ နိုင်ငံရေး လွတ်လပ်ခွင့်ကိုလည်း ယုံကြည်မှုအပြည့်အဝဖြင့် ပေးအပ်နိုင်ပေလိမ့်မည်။

၂ဝ၁၁ သြဂုတ်လ ၁၂ ရက်နေ့က ဒေါ်အောင်ဆန်းစုကြည်နှင့် အစိုးရကိုယ်စားလှယ် ဝန်ကြီး ဦးအောင်ကြည်တို့ တွေ့ဆုံဆွေးနွေးကာ သဘောတူညီချက်များကို ထုတ်ပြန်ခဲ့သည်။ သို့ဖြစ်ရာ ယခုအခါတွင် ဒီမိုကရေစီကို အခြေပြုထားသော နိုင်ငံရေးစနစ်၌် မြန်မာ့ရေမြေသဘာဝနှင့်လိုက်ဖက်စွာ မည်သည်တို့ကို အခြေခံ၍ မည်သို့ လုပ်ဆောင်သင့်သည်ကို ဘက်နှစ်ဘက်က အမြော်အမြင်ကြီးကြီး လိုက်လျောညီထွေစွာဖြင့် ပွင့်ပွင့်လင်းလင်း ဆက်လက်ဆွေးနွေးနိုင်ကြဖို့ ဖြစ်လာတော့မည်ဟု ယူဆမိသည်။

ပြည်သူလူထုလုံခြုံရေးအတွက် အထက်ဖော်ပြပါ ၅ ချက်အတွက် သက်ဆိုင်ရာလုပ်ငန်းစဉ်များမှာ အတော်ပင် များပြားပြီး အဆင့်ဆင့်လုပ်ဆောင်ရမည်လည်း ဖြစ်သောကြောင့် နှစ်ဘက်စလုံးက မိမိတို့ရနိုင်သမျှ အရင်းအမြစ် စွမ်းအားတို့ကို ထိရောက်စွာဖြင့် အချိန်ယူ အသုံးချရမည်မှာ သေချာသည်။ အားလုံးကို တပြိုင်တည်းလုပ်၍ မဖြစ်နိုင်သောကြောင့် လတ်တလော လုပ်ဆောင်နိုင်မည့် အစီအစဉ်များနှင့် ရေရှည် လုပ်ဆောင်မည့် စီမံကိန်းများ ဟူ၍ အမျိုးအစားများ ခွဲခြားလုပ်ဆောင်လာမည်ဟု ဆိုနိုင်ပေသည်။

လတ်တလော လုပ်ဆောင်နိုင်မည့် အစီအစဉ်များတွင် ဘက်၂ဘက်၏ ကနဦးသဘောတူချက်များဖြင့် အချိန် မဆိုင်း ယခုချက်ချင်း ဖြစ်နိုင်သမျှ ဆောင်ရွက်ရန် လိုအပ်နေသည်များ ရှိသည်။ နှစ်ဘက်စလုံးက အာမခံကာ လုပ်ဆောင်ပေးမည့် သဘောတူညီချက်အပေါ် မူတည်သည်။ ရေရှည်စီမံကိန်းအတွက်မူ ဖော်ပြပါ ၅ ချက်စလုံး၏ အဓိကဇစ်မြစ်တို့မှာ ရွေးကောက်ပွဲများနှင့် ဖွဲ့စည်းပုံအခြေခံဥပဒေ ဖြစ်သည်ဟု ယူဆမိသည်။ အဓိကဇစ်မြစ်တို့ကို ရှောင်ရှားကွေ့ဝိုက်၍ မရနိုင်ပါ။ တရားဥပဒေစိုးမိုးမှု၊ လူ့အခွင့်အရေးများ၊ ပြည်တွင်းငြိမ်းချမ်းရေး စသဖြင့် တခုချင်းကို ဦးတည်လုပ်ဆောင်သည်ထက် မူရင်းဇစ်မြစ်တို့ကို အရင်ဦးဆုံး ရှင်းရှင်းလင်းလင်း လုပ်ထားနိုင်လျှင် ဖော်ပြပါ ၅ ချက်စလုံးအပြင် နောက်ထပ် လိုအပ်ရန်ရှိသည်များကိုပါ တနွယ်ငင်တစင်ပါ တခါတည်း ဖြေရှင်း ပြေလည်သွားနိုင်ပေလိမ့်မည်။

နှစ်ဘက်စလုံးက ပဋိပက္ခအသွင်ဆောင်သော သဘောထားအမြင်များကို ရှောင်ရှားကြပြီး အပြန်အလှန် ကူညီသော ပူးပေါင်းဆောင်ရွက်မှုဖြင့် လုပ်ဆောင်ခြင်းမပြုမီ ထိုသို့လုပ်ဆောင်ရန် အမှန်တကယ် စိတ်ဆန္ဒ ရှိကြောင်း ပြသသည့် ကနဦးသက်သေပြချက်များ ရှိနေပါက တဘက်နှင့်တဘက် ပိုမိုယုံကြည်စွာဖြင့် မြန်မြန်ဆန်ဆန် ထိထိရောက်ရောက် လုပ်ဆောင်နိုင်ပါလိမ့်မည်။ ထို့ပြင် နိုင်ငံ့အာဏာ မြစ်ဖျားခံရာဖြစ်သော ပြည်သူလူထု၏ ယုံကြည်ကိုးစားမှုနှင့် အားပေးထောက်ခံမှုကိုလည်း ရရှိလာနိုင်သဖြင့် ပို၍ပင် မြန်ဆန်စွာ အောင်မြင်နိုင်မည် ဖြစ်သည်။

ကနဦးသက်သေပြချက်များတွင် ချွင်းချက်မရှိသော အထွေထွေလွတ်ငြိမ်းချမ်းသာခွင့်သည် ပြည်သူလူထု တရပ်လုံး၏ ပကတိလိုအပ်ချက်များကို ဖြည့်ဆည်းလိုသော ဆန္ဒများကို အသင့်တော်ဆုံး ဖြည့်ဆည်းပေးမှုများထဲမှ သမိုင်းတွင်မည့်လုပ်ရပ်တခု  ဖြစ်လာပါလိမ့်မည်။ လွတ်ငြိမ်းချမ်းသာခွင့် ရရှိသူတို့က နိုင်ငံတည်ငြိမ် အေးချမ်းရေးနှင့် ဖွံ့ဖြိုးတိုးတက်ရေးတို့တွင် ပါဝင်ပေါင်းစပ်ပေးနိုင်မည်ဖြစ်ရာ မြန်မာနိုင်ငံအတွက် တနည်းနည်းဖြင့် အကျိုးရှိမည်သာ ဖြစ်သည်။

လွင်အောင်စိုး

၂၆-၈-၂ဝ၁၁

Download pdf – Hopeful first step for nation’s stability and peace

Written by Lwin Aung Soe

August 26, 2011 at 9:07 am